• Категория:
  Исследование
• Рейтинг:
  3.5/2
  • 1
  • 2
  • 3
  • 4
  • 5
• Активность:
  1382

      Савецкая – старэйшая вуліца горада Баранавічы. Яна ўтварылася на месцы прасёлачнай дарогі, якая злучала вёскі Антанова і Грабавец.  Ужо ў ХІХ ст. яна была цэнтрам эканамічнага і культурнага жыцця горада і раздзяляла Старыя і Новыя Баранавічы. У розныя перыяды гісторыі горада  назва вуліцы мянялася некалькі разоў.

       Першапачатковая назва вуліцы – Марыінская, у гонар Марыі, дачкі графа Івана Развадоўскага. Тут размяшчалася шмат магазінаў і грамадскіх пабудоў.

       У 1915 годзе Баранавічы былі акупіраваны нямецкімі войскамі. Вуліца Марыінская была перайменавана ў Хаўптштрасэ. Пасля адыходу немцаў вуліца недзе да 1921 года вярнула сваю даваенную назву.

     У выніку падпісання Рыжскага мірнага дагавору Беларусь была падзелена на дзве часткі: Усходнюю і Заходнюю. Заходняя Беларусь адышла да Польшчы. А разам з ёй і Баранавічы. У 1921 годзе новая ўлада назвала галоўную баранавіцкую  вуліцу ў гонар Шаптыцкага, польскага генерала, камандуючага Літоўска-беларускім фронтам. Вуліца Шаптыцкага была цэнтрам дзелавога жыцця Баранавіч польскага перыяду. Пасля далучэння  Заходняй Беларусі да БССР у 1939 годзе вуліца змяніла назву на цяперашнюю – Савецкая.

         Падчас акупацыі горада фашысцкімі войскамі галоўная вуліца насіла назву Марынская. З 1945 года яна зноў стала называцца Савецкай і захавала гэтую назву да цяперашняга часу.

        За час свайго існавання вуліца павялічыла працягласць, змяніла аблічча, але па-ранейшаму засталася цэнтрам гарадскога жыцця. Ад плошчы  да пуцеправода яна вымашчана брукам пачатку ХХ стагоддзя, рэканструкцыя якога адбылася ў канцы 2010 года. З канца 1990-х гадоў вуліца часткова стала пешаходнай. Унікальнасць вуліцы яшчэ і ў тым, што тут захаваліся будынкі, амаль равеснікі самога горада.